04.07.2018

Ног æмæ хуыздæр

 Æрыдоны сæйраг рынчындон сæхгæдтой цалцæггæнæн куыстыты тыххæй.

Æрыдоны цæрджытæ рагæй цæмæ æнхъæлмæ кастысты, уый сыл æрцыд. Сæ районы рынчындон сын цалцæг кæнын райдыдтой. Тагъд æххуыс дзы нырма кусы, фæлæ дзы æрхуыссыны фадат нырма нæй. Адæмæн цæугæ у иннæ горæттæм. Кæд рынчынты бабыхсын хъæуы, уæддæр разы сты. Цалцæджы фæстæ сæ рынчындоны фæзындзæн æппæт хъæугæ æмæ æмбæлгæ уавæртæ.

Цæгат Ирыстоны сæргълæууæг Битарты Вячеслав æмæ Владимир Путины ивгъуыд азы апрелы фембæлды хатдзæгтæм гæсгæ 58 бæстыхайы социалон нысаниуæгимæ саразынæн æмæ сцалцæг кæнынæн республикæйæн радих кодтой 1 миллиард сомы. Се `хсæнмæ бахаудысты Æрыдоны районы сæйраг рынчындон æмæ поликлиникæ дæр. Районы цæры 28 мин адæймаджы. Се `ппæт дæр хаудысты рынчындонмæ. Уым та бынат 138 рынчынæн йедтæмæ нæй. Уымæй уæлдай ма дæсгай азты бæстыхай цалцæггонд дæр нæ цыд. Ныр дзы бындурон куыстытæ бакæнынæн радих кодтой 300 милуан сомы. Рынчынтæ æмбарынц, бæстыхай рацаразын рагæй хъæуы. Сæ ныхæстæм гæсгæ дзы, фæлтæрдджын дохтыртæ кусы, фæлæ сын æмбæлгæ фадæттæ нæ уыд.

¤ Рынчындоны сæйраг дохтыр куыд зæгъы, афтæмæй Æрыдоны поликлиникон æмæ тагъд æххуыс ныридæгæн дæр дæттынц. Стационарон æгъдауæй та фыццаджыдæр дзæбæх кæндзысты Алагир, Дигора æмæ Дзæуджыхъæуы рынчындæтты.

Æрыдоны районы Центрон рынчындоны сæйраг дохтыр Дыдарты Владимир: «Цалцæггæнинаг рагæй у. Ивгъуыд азы апрелы нæ республикæйы сæргълæууæг Мæскуыйы куы уыд, уæд уый фæстæ рабæрæг ис, хъуыддагмæ æвæстиатæй æркæсын кæй хъæуы. Æмæ абон республикæйы хицауад æмæ профилон министрады руаджы æхгæнæм рынчындон цалцæг кæныны тыххæй».

Рынчындоны рацарæзтæн цы фæрæзтæ радих кодтой, уыдон хардзгонд цæудзысты æрмæст цалцæгыл нæ, фæлæ ма ног нырыккон медицинон кусæнгæрзтæ балхæнынæн дæр.